දැල්ලන් කියන්නේ ප්‍රෝටීන් බහුල ආහාරයක්. ඒවගේම තමයි තරමක් උෂ්ණාධික කෑමක් විදිහටත් දැල්ලන් හදුන්වන්න පුළුවන්. බොහෝ වෙලාවට උත්සව අවස්ථාවන්වලදී කුකුළු මස් කාරී එහෙමත් නැත්නම් මලු ඇඹුල්තියල් හදන්න තමයි ගොඩක් ගෘහනියන් පෙලෙබෙන්නේ. නමුත් වෙනසකටත් එක්ක දැල්ලන් කාරී එකක් හදන්න පුළුවන් නම් සාමාන්‍ය උත්සව මෙනු එකට විශේෂත්වයක් එකතු කරන්න පුළුවන් වේවි. ඉතින් අද අපි කියල දෙන්නේ දැල්ලන් විවිධ රසවත් ක්‍රම 5කට උයන්න පුළුවන් ආකාරයි.
දැල්ලන් කළු පොල් ව්‍යංජනය
අවශ්‍ය ද්‍රව්‍ය
ශුද්ධ කර සෝදාගත් දැල්ලන් කිලෝ 1
සිහින්ව කපාගත් ලොකු ළුනු ගෙඩි 2
ලියාගත් සුදුළුණු බික් 6
කපාගත් අමු මිරිස් කරල් 6
කරපින්චා ඉති 2
තුනපහ මේස හැඳි 2
මිරිස් කුඩු මේස හැඳි 1
කහ තේ හැඳි 1/2
රම්පෙ , සේර
රස අනුව ලුණු
කුරුඳු පොතු කැබැල්ලක්
බැඳ අඹරගත් කැකුළු හාල් , පොල් මේස හැඳි 4ක්
තෙල් මේස හැඳි 2
ගොරක කැබලි 2ක්
ගම්මිරිස් ස්වල්පයක්
දැල්ලන් තරමක කැබලි වලට කපා ගන්න. බඳුනක් ලිප තබා තෙල් දමා රත් වූ පසු සුදුළුණු, රම්පෙ , කරපින්චා, කුරුඳු පොතු , අමු මිරිස්, දමා විඳි කිහිපයක් තෙම්පරාදු කරන්න. එයට දැල්ලන් කැබලි එකතු කර විනාඩි 5ක් පමණ මන්ද ගින්දරේ තෙම්පරාදු කරන්න. දැන් එයට මිරිස් කුඩු, තුනපහ, කහ , ගම්මිරිස්, බැඳ අඹරගත් කැකුළු හාල් , පොල් , ගොරක, ලොකු ළුනු දමා වතුර කෝප්ප 1/2 ක් පමණ දමා මදගින්නේ විනාඩි 45ක් පමණ පිස ගන්න. රස අනුව ලුණු එකතු කරගන්න.
දැල්ලන් පුරවා ඉවීම
අවශ්‍ය ද්‍රව්‍ය
අඟල් 6ක් පමණ දිග දැල්ලන් 10
බැඳ පියලි කරගත් මුං පියලි 50g
සිහින්ව කපාගත් රතු ළුනු ගෙඩි 6ක්
අමු මිරිස් කරල් 10
උලුහාල් ස්වල්පයක්
මිරිස් කුඩු තේ හැඳි 2
ලුණු
පොල්තෙල්
කරපිංචා ඉති 2
පොල් කිරි කෝප්ප 1
කහ, තුනපහ අවශ්‍ය පමණ
දෙහි ගෙඩියක ඇඹුල්
දැල්ලන් ඔලු ඉවත් කර සිවිය ගලවා හොඳින් සෝදා ගන්න. රතු ළුනු, අමු මිරිස්, කරපිංචා, දෙහි හා ලුණු එකට කවලම් කර තෙල් ටිකක් ලිප තබා හොඳින් තෙම්පරාදු කරන්න. බැඳ පියලි කරගත් මුං පියලි තෙම්පරාදු කරගන්න ලද මිශ්‍රණය සමඟ කවලම් කොට මිශ්‍රණයක් සාදාගන්න. දැන් එම මිශ්‍රණය දැල්ලන් ඇතුලට පුරවා නුලකින් ගැට ගසා වළදකට දමාගන්න. එයට මිරිස් කුඩු,කහ, තුනපහ, එකතු කර පොල් කිරි දමා හොඳින් පිස ගන්න.
දැල්ලන් බැදීම
අවශ්‍ය ද්‍රව්‍ය
අඟල් 6ක් පමණ දිග දැල්ලන් 10
ගම්මිරිස් හා කහ කුඩු තේ හැඳි 1
විනාකිරි
ලුණු
දෙහි
පොල්තෙල්
දැල්ලන් ඔලු ඉවත් කර සිවිය ගලවා හොඳින් සෝදා කැලි කපා ගන්න. එයට ගම්මිරිස්, කහ කුඩු, විනාකිරි,ලුණු , දෙහි, එකතු කර හොඳින් අනා ටික වෙලාවක් තබන්න. ඉන්පසු තාච්චියක් ලිප තබා තෙල් දමා රත් වූ පසු දැල්ලන් දමා බැඳ ගන්න.
දැල්ලන් මිරිසට තෙම්පරාදුව
අවශ්‍ය ද්‍රව්‍ය
අඟල් 6ක් පමණ දිග දැල්ලන් 10
සිහින්ව කපාගත් රතු ළුනු ගෙඩි 6ක්
සුදු ලුණු බික් 3ක්
අමු මිරිස් කරල් 5
උලුහාල් ස්වල්පයක්
මිරිස් කුඩු තේ හැඳි 2
ලුණු
කරපිංචා ඉති 2
කහ, තුනපහ අවශ්‍ය පමණ
දෙහි ගෙඩියක ඇඹුල්
දැල්ලන් කපා හොඳ හැටි ශුද්ධ කොට අඟල් 2ක පමණ කැබලි වලට කපා ගන්න. එය බඳුනකට දමා ඉතුරු ද්‍රව්‍ය සියන්න එයට දමා වතුර කෝප්පයක් දමා ලිප තබන්න. මාලුව ඉදුණ පසු තෙම්පරාදු කර තුනපහ කුඩු ඉසගන්න.
දැල්ලන් කිරට ඉවීම
අවශ්‍ය ද්‍රව්‍ය
අඟල් 6ක් පමණ දිග දැල්ලන් 10
සිහින්ව කපාගත් රතු ළුනු ගෙඩි 6ක්
සුදු ලුණු බික් 3ක්
අමු මිරිස් කරල් 5
උලුහාල් ස්වල්පයක්
මිරිස් කුඩු තේ හැඳි 2
ලුණු
කරපිංචා ඉති 2
කහ, තුනපහ අවශ්‍ය පමණ
දෙහි ගෙඩියක ඇඹුල්
පොල් කිරි කෝප්ප 1ක්
මුරුංගා කොළ අහුරක්
දැල්ලන් කපා හොඳ හැටි ශුද්ධ කොට අඟල් 2ක පමණ කැබලි වලට කපා ගන්න. එය බඳුනකට දමා ඉතුරු ද්‍රව්‍ය සියන්න එයට දමා වතුර කෝප්ප 1/2ක් දමා ලිප තබන්න. එය හොඳින් තම්බුන පසු පොල් කිරි එකතු කර හොඳින් පිස ගන්න. එයටම මුරුංගා කොළ ටිකත් එකතු කරගන්න.
